75 Jahre
Jodlerklub Meierisli Arch
Unterstützt durch
D'Meierisler si stolz uf ihres nöie Jodlerhemmli
Mir gratuliere üsem Aktivmitglied Paul Brand, Lengnau ganz härzlech zu sim 80. Geburtstag, wo är am 16. Novämber 2024 het dörfe fiire.
Sit 55 Jahr isch dr "Pöik" Mitglied i üsem Jodlerklub und het i dere länge Zyt e grosse Bytrag zum Gedeihe vo üsem Verein bytreit. Är het ou mängs Jahr als Bysitzer oder aus Sekretär tatchräftig im Vorstand mitgwürkt. Dr Pöik isch e wichtigi Stütze im 1. Bass u verschöneret üse Chorklang mit sire chäche Stimm wo är sogar ab u zue als Solischt tätig isch. Wenn's im Klub öbbis z'Wärche git, macht dr rüschtig Pöik immer wieder mit u fröit sich wenn är mit sine Kamerad/inne cha gmüetlech zäme si.
Dr Jodlerklub Meierisli dankt em Ehreveteran Paul Brand für sis bishärige, grosse Engagement und fröit sich mit ihm uf vieli wyteri, gmüetlechi und kameradschaftlechi Vereinsjahr.
2024 Summer-Impressione vor Meierisli-Familie
Das isch üses nöie Jodlerhemmli
Es git e nöii Fuess-Ungerlag
Es gmüetlechs u unvergässlechs Fescht im Rütiwald!
Das isch üses nöie Jodlerhemmli
Uftritt am Seeländische Jodlerträffe 2024 in Lyss
Am 1. März 2024, isch die chlyni Marline Rosalia gebore.
Dr Jodlerklub Meierisli gratuliert üsem Jodlerkamerad Patrick Egli, zäme mit sire Sophia ganz härzlech zu däm fröidige Ereignis!
Mir wünsche dr junge Familie vo Härze viu Freud u Glück!
Häbet sorg zunang!
Am 23. Februar 2024, 03:23Uhr isch e nöie Ärdebürger, dr chly Matteo Louis gebore.
Dr Jodlerklub Meierisli gratuliert üsere Jodlerin u Vizedirigäntin Melina Beer zäme mit ihrem Mättu ganz härzlech zu däm bsundrige Ereignis!
Mir wünsche dr junge Familie vo Härze viu Freud u Glück!
Häbet sorg Zäme!
Rückblick
Am 2. / 3. Februar 2024 het dr Jodlerklub Meierisli, zäme mit dr Theatergruppe Aarebühni Arch wieder es erfolgrichs Konzärt und Theater dörfe dürefüehre. Aune üsne treue Gescht danke mir ganz härzlech für ihres sehr zahlriiche Erschiine!
Die wo's intressiert, chöi hie no üse Film zum 75. Jährige Jubiläum go aluege...
Am 9./10. Sept. 2023 hei mir üsi Jubiläums-Jodlerreis dörfe dürefüehre.
Im Video fingsch es paar Impressione vo däm abwächsligsriche Ereignis...
Am 20. Mai 2023 hei mir üses 75. Jubiläum im ne chlyne Rahme, zäme mit ygladne Gescht gebührend dörfe fire...
Zytigsbricht vom
Gränchnertagblatt
Föteli alässlech Jubiläumsfir vom 20. Mai 2023
A K T U E L L
Ufnahm vo 1952
Gründer
Ufnahm vo 1973 alässlech vom 25 Jahr Jubiläum
Am 4. und 5. Februar 2023 hei mir wiedereinisch üses Konzärt und Theater dörfe dürefüehre.
Mir danke aune üsne Gescht wo nis a dene zwe Öbe so zahlrich si cho bsueche und mit üs es paar abwächsligrichi u gmüetlechi Stunde verbrocht hei.
Am 1. Sept. 2022 het dr JK Meierisli wieder am Soledurner Chästag dörfe mitmache.
Mir si a verschiedene Plätzli ir Vorstadt ufträtte u hei immerhin 16 Jodulieder gsunge.
Es isch e sehr gmüetleche Alass gsi!
Mir gratuliere ganz härzlech üsem Jodlerkamerad Patrick Egli wo am 3. Sept. 2022 si liebi Frou Sophia ghürote het. Dr Jodlerklub het a dere fiirleche Hochzytszeremonie und a dr Toufi vo ihrer härzige Ida dörfe teilnäh.
Mir wünsche em Brutpaar und dr junge Familie ganz viu Liebi u Glück für d‘Zuekunft und dass aui gmeinsame, kreative Projekt erfolgriich chöi realisiert wärde!
Häbet Sorg zunang u heits guet Zäme!
Am 26. Mai 2022 hei d'Meierisler wiedereinisch ihre traditionell Maibummu chönne dürefüehre. Im Videdo chasch go luege, was mir aus gmacht hei...
Üse Fondüplausch vom 13. Novämber 2021 isch e glungnige und erfolgriche Obe gsy.
Mir hei im Gmeinszäntrum Arch e grossi Geschteschar dörfe begrüesse.
Mi hets gspürt, dass es d'Lüt sehr gnosse hei, wiedereinisch dörfe gmüetlech zämehöckele, ässe, trinke u Volkstümlechi Musig lose...
Dr Jodlerklub Meierisli dankt aune Gescht ganz härzlech, dass si trotz Zertifikatspflicht so zahlrich erschine si!
Es Früehligsliedli...
Februar 2020
30 Jahr Tombola
Dr Martin Wenger isch sit 30 Jahr üse Tombola-Scheff. Mir danke ihm ganz härzlech zu dere grosse Leischtig. Dank ihm und sine treue u flissige Hälferinne dörfe mir üsne Gescht jedes Jahr e wunderbari Tombola präsentiere.
E ganz e grosse Dank gebührt aber ou de Jodler-Baschtufroue für ihri liebevoll härgstellte Tombolaprise!
Martin Wenger
mit Annerös Lerch & Remy Brand
Konzärt & Theater 2020
Mit grosser Freud erinnere mir üs a zwe glungeni und erfolgriichi Vorstellige...
Wenn uf d Föteli kliksch, gsehsch se grösser, mit es paar Infos...
Adrian Mamma Sohn Tochter
Es Summerliedli...
Chürbisnacht 2019
Am 25. Oktober hei mir z'Gränche ungerem Stadt-Dach und ufem Märetplatz dörfe ufträtte.
Es het no paar Föteli vo dr Gränchner Street-Dancegruppe derby...
Hingerbliebene-Reisli 2019
Am 8. Mai 2019 hei mir üses "Hingerbliebenereisli" düregfüehrt. Souverän u sicher si mir vom Walter Friedli dürs Aemmitau chauffiert worde. Trotz Räge hei mir e sehr gmüetleche Tag chönne verbringe...
Seeländisches Jodlerträffe 2019
Am 1. Sept. 2019 het in Kallnach s Seeländische Jodlerträffe stattgfunge.
Es isch e Säuteheit, dass e Klub vom ungere Seeland a däm Alass teilnimmt. Mir Meierisler hei dä Tag sehr gnosse und s erschte mou unger dr Leitig vo üsere nöie Dirigäntin Christina Wanner dörfe uifträtte.
Maibummel 2019
Am 30. Mai2019 (Auffahrt) hei mir üse traditionell Maibummel ungernoh. Bi herrlichem Wätter isch üsi Wanderig düre Buechibärg vo Mühledorf via Aetikofen bis zur Waudhütte Biezwil gange. Härzleche Dank de Organisatore vom 2. Bass!